बारा ,९ फागुन । दुईवटा पसलमा आगलागी हुँदा १५ लाख बराबरको क्षति भएको छ। महागढिमाई नगरपालिका-६ बबुआईन बजारमा रहेको निरन्जन चौधरीको इलेक्ट्रोनिक मोबाइल पसल र दिप नारायण चौधरीको किराना पसलमा विद्युत सर्ट भई शुक्रबार बिहान आगलागी भएको हो।
आगलागीबाट मोबाइल पसलमा रहेका मोबाइल, कम्प्युटर, ल्यापटप र किराना पसलमा रहेका किराना तथा खाद्यान्न लगायतका सामानहरू जलेर करिब १५ लाख रुपैयाँ बराबरको धनमाल नष्ट भएको जिल्ला प्रहरी कार्यालयले जनाएको छ।
प्रहरीले स्थानीय बासिन्दा तथा दमकलको सहयोगमा आगलागी नियन्त्रणमा लिनुका साथै यस सम्बन्धमा आवश्यक अनुसन्धान गरिरहेको जनाएको छ।
